۲۷ سیپتمبر ۱۹۹۶؛ تاسو چیرته وئ؟

لېکنه: سید سلیمان اشنا

پدې ورځ زه جلال اباد کې وم. خبرونو کې مو واوریدل چې طالبانو ارګ ونیو او لمړنی اقدام یي د ملګروملتونو له دفتره د مستعفي جمهور رئیس نجیب الله نامعلوم ځای ته وړل وو. غرمه مهال خبر شولو چې نجیب الله او د هغه کشر ورور جنرال احمدزی په بی رحمه او مرموز ډول قتل شوي او د آریانا څلورلارې په ترافیک څار برج نه د اوبو په پیپ زړول شوي.

ماښام نړیوالو رسنیو وویل چې د ملابورجان په نوم د طالبانو یو قوماندان مسؤل و چې نجیب الله خوندي وساتي، خو کابل ته له رسیدو مخکې د کابل- جلال آباد په لاره کې په مرموز ډول وژل شوی.

بیا خبر شوو چې د پاکستاني پوځیانو یوه ډله چې کټ مټ د طالبانو په څیر لباس، شکل خو پردۍ ژبه یي کاروله، نجیب په ارګ کې پدې شکنجه او وواژه چې لمړی پری د ډیورند سند امضا کړي، خو دا چی نجیب الله رسمي مقام نه و او لاسلیک یي ونکړ، د پاکستان ضد دریځ له امله بی رحمه قتل او په فجعي بڼه عام محضر کی وځړول شو. ډیرو معتبرو شخصیتونو په خصوصي ډول وویل چې د نجیب الله په بی رحمه وژنې خوشحالۍ کې په راولپېنډۍ، اسلام اباد، او “ځینو” غربي سفارتخانو کې د شرابو ګلاسونه پورته او نڅاوې وشوې. ډیر شمیر افغان مجاهدینو چې د ۱۹۹۰ کال کابل یي صرف د ارګ د نیولو په خاطر کوڅه په کوڅه لوټ، تالان، عام ولس قتل، برمته او فراري کړ، هم خوشحالي وکړه او د طالبانو دا عمل یي شرعي وګڼو.

ډیرو روښانفکرانو، ولسواکۍ پلوه او ملتپالو افغانانو د طالبانو لخوا ددې مستعفي شخص او د هغه د ځوان ورور بی رحمه قتل کولو مسؤلیت اخستل د طالبانو سیاسي ناکامي وبلله، د اسلامی اصولو د احکامو خلاف او د نړۍوالو میثاقونو سرغړونه وګڼله. نن ۲۵ کاله وروسته د امریکا د وخت سفیر پیټرټامسن په خپل کتاب The Wars of Afghanistan کې وایی: نجیب الله د ملګروملتونو له دفتره په چل او فریب ارګ ته بیول شوی. ملګرو ملتونو تراوسه په خپل دفتر د دی پېښې پلټنه نده کړې، که یي پټه کړې، علني کړې یي نده.

د نجیب الله د جمهوریت دوره کې څو مهم تاریخي اقدامات شوي چې تر ننه د افغانستان د استقلال، ثبات او ملي وحدت د تامین لپاره په منشور بدل شوی.

۱ـ ملي مصالحې اعلان

۲ـ د اساسي قانون تعدیل

۳ـ د احزابو جوړولو آزادي

۴ـ وطن ګوند ولسي کول

۵ـ د ټول شموله نظام لپاره انتخاباتو منل

۶ـ بیرته ستنیدونکو مهاجرینو او مجاهدینو ته امکانات او تجهیزات برابرول

۷ـ ملي تاسیساتو او ملي شتمنیو ساتل

۸ـ عمومي بخښنه اعلانول

۹ـ د خارجي مداخلو قاطع منع کول

۱۰ـ د معاضلې حل ته د ملګرو ملتونو منځګړتوب حتمي ګڼل

اوس دا ټولې هڅې بیا له سره پیلې شوي، خو د سولې او امن په پرتلې د نوې جګړې د پېل او وطن ورانولو، ملي او طبعي خزانو تالان، غلا او قاچاق ته ډیر پلانونه جوړیږي!

نور ښکاره کړئ

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Back to top button