په ښي که چپ اړخ خوب زړه ته ګټه لري؟

ژباړه: شمشاد افغان

د خوب په اړه به مو کلیوالې او عامې خبرې زیاتې اوریدلي وي، چې څنګه یې کول ښه او څنګه ښه نه دي.

روغتیا پوهان وایي، چې د خوب بڼه پر روغتیا، خاصتاً پر زړه ډېر اغېز لري.

ډاکټران باور لري، چې د خوب بڼه نه یوازې پر زړه؛ بلکې د ملا پر درد او د وجود پر نورو برخو هم اغېزې لري.

دلته به د دوی له نظره در ته ووایو، چې په ښي که کیڼ اړخ څملاستل ښه دي او خاصتاً زړه ته یې کومه بڼه زیاته ګټه لري.

روغتیا پوهان سپارښتنه کوي، چې د زړه ناروغان دې په کیڼ اړخ نه څملي. دوی په دې اړه ډېرې څېړنې هم نه دي کړي، چې د هغو په اساس د داسې ملاستې ګټې وښيي، خو اټکل کوي، چې د ښي اړخ ملاسته به نسبتاً ګټوره وي.

په کیڼ اړخ د زړه د ناروغانو د نه ویدیدو دلیل دا ګڼل کیږي، چې داسې ویدیدل پر زړه فشار زیاتوي.

د زړه د ښځینه ناروغانو په اړه یوه څېړنه ښيي، چې دوی ته د حمل لرلو پر وخت دواړه ډوله ویدیدل یو رقم دي. دوی ته سپارښتنه دا ده، چې د حمل په وروستیو میاشتو کې دې پر ملا نه څملي، ځکه پر رحم یې فشار راوړي او جنین ته یې زیان اړولی شي.

نور خلک څه وکړي؟

د نورو خلکو یا هغوی په اړه چې د زړه ناروغان نه دي، روغتیا پوهان وایي چې د دوی د خوب بڼه مهمه نه ده، د خوب کیفیت یې مهم دی.

په دې مانا، چې دوی څنګه ښه خوب کولای شي، هماغسې دې ویده شي. د خوب کیفیت روغتیا پوهانو ته یوه مهمه موضوع ده، چې ټینګار ورباندې لري او له خلکو غواړي، چې د ښه کیفیت لرونکي خوب د لرلو هڅه وکړي.

په ټوله کې روغتیا پوهان وایي، چې د خوب کمیت او کیفیت دواړه د روغتیا لپاره ډېر ضرور دي.

هغه کسان، چې کافي او مناسب خوب نه لري، د نورو خطرونو ترڅنګ د زړه په ناروغۍ د اخته کیدو خطر سره مخامخ دي.

دوی هغو کسانو ته، چې کافي او مناسب خوب نه لري، روغتیا پوهانو ته ورتګ ضرور بولي.

نور ښکاره کړئ
دا هم ولولی
Close
Back to top button