ورتلونکي حقيقت / عبدالسلام ضعیف
عبدالسلام ضعیف
دنیا دومره خوږه سوه اخر کار د خلکو هېر شو
ورتلونکي حقيقت ته انتظار د خلکو هېر شو
حاضر په هدېرو کې ناظرين دي ياران ويني
د قبر په مشهد کې بڼ او نار د خلکو هېر شو
دا لويه سلسله ده پريکون نلري را درومي
چې شلېږي د ژوندون اومړی تار د خلکو هېر شو
حساب او کتاب دواړه د عمل مطابق کېږي
د دې ورځې پېچلی اختبار د خلکو هېر شو
د ژوند په رنګنيو کې ابد خوبونه ويني
راغلی بېرته تللی تېر معمار د خلکو هېر شو
ادب، عزت، د ژوند نزاکتونه وروسته پاتې
د ښځو په طاعت کې مور او پلار د خلکو هېر شو
حلال او حرام يو ډول په ګټه کې ګډ شوي
د دين په قوانينو کاروبار د خلکو هېر شو