د ښاغلي مفتاح الدین ساپي پر یوه داستاني ټولګه چې د (رژیدلي ارمانونه) په نامه یادیږي یو څو لنډې خبرې

 

د ښاغلي مفتاح الدین ساپي  پر یوه داستاني  ټولګه چې  د (رژیدلي ارمانونه) په نامه یادیږي یو څو لنډې خبرې

زموږ په تاریخي، لرغوني او ادب  پاله هیواد افغانستان کې پښتو  ژبه  د نورو ژبوپه څنګ کې یوه اصالت لرونکې، تاریخي، پیاوړې او دعلم د پراخو سر چینو لرونکې اود سترو لیکوالو، ادیبانو او شاعرانو ژبه  ده .

 که چیرې د علم، ادب، هنراو شعر غوړیدلي، ویاړلي او رنګین تاریخ ته په غور سره وګورو، له نیکه مرغه زموږ د هیواد زیاترو پوهانو، څیړونکو، عالمانو، لیکوالو،  ادیبانو او شاعرانو د خپلې لوړې  پوهې، ژورو خیالونو او فکرونو په  وسیله  د علم، کلتور، ادب  او هنر رنګینه  نړۍ، روښانه  او ځلانده  ساتلی  ده .

ښاغلی مفتاح الدین ساپي له هغو علمي او ادبي سټو څخه دی چې زموږ د پښتو ادب  د پرمختګ او پراختیا په  برخه کې یې  د خپلو علمي، کلتوري او فرهنګي اثارو له  لارې ګټوره  او اغیزناکه  ونډه اخیستې ده .

ښاغلی مفتاح الدین ساپي د خدای بخښلي اباخان  زوی دی، چې پر(۱۳۱۵) لمریز کال د کنړ ولایت په  مزار دره کې په یو درنه کورنۍ کې  زیږیدلې دی .

ده خپلې زده کړې په کونړ، کابل اوامریکې کې پای ته رسولې دي ، او له خپلو لوړو زده کړو وروسته  په  بیلابیلو دولتي دندو کې بوخت وُ .

ساپي صاحب  یو پیاوړې  لیکوال، خوږ  ژبې شاعر، غښتلی او پوخ  داستان لیکونکی ،  تکړه   ډرامه  لیکونکې او وتلې  ژباړونکې دی .

ده دیوشمیرغربي شاعرانو اولیکوالو اثار په پښتو ژبه  ژباړلي اوخپاره کړي دي . د ده ادبي اوفرهنګي  سټه   نه یوازی په  هیواد کې د ننه  بلکې په  بهر کې هم  پیژندل شوې ده . دی په انګریزي  ژبه هم شعرونه او لیکنې لري .

دساپي صاحب  چاپ شوي اثار دا دي :

–   نړیوالې سندرې (ژباړه)

–  سپیدې- نړیوال شعرونه ( ژباړه)

–  مات وزر- نړیوال  لنډې کیسې  ( ژباړه)

–  ادبي او هنري څیړنې

–  نیمګړي انځورونه – (شعري ټولګه)

–  رژیدلي ارمانونه  د ( لنډو کیسو ټولګه)

او همداسې د هیواد په ورځپاڼو، مجلو او مطبوعاتو کې  د ده ګڼ شمیر چاپ شوې مقالې خپرې شوې دي .

د ښاغلي  مفتاح الدین  ساپي  د ( رژیدلي ارمانونه) په  نامه د لنډو کیسو ټولګه   پر (۲۰۱۵ ) زیږدیز کال کې چاپ  شوې  ده .

ښاغلي ساپي  په  ډیر اخلاص سره  د خپل دغی کتاب  یو ټوک ماته  ډالۍ کړ ، ماهم په  ډیره  مینه او پاملرنې سره  دا اثر  ولوست .

په دې کتاب کې (۶)  غمجنې او دردونکې کیسې لیکل شوې دي .  ده  په خپلو  کیسو کې  زموږ  په  جګړه ځپلي ، کړیدلي او ځوریدلي هیواد کې  د لوټمارو،  تالنګرو، ظالمانو او زور واکو ناولې، تورې او کرغیړنې څیرې او د دوی  وحشت او دهشت، وژل ، ترور او بې پتي،  جنایت او ظلمونه  ، د مادي او معنوي شتمنۍ لوټول،  د مظلومانو مظلومیت، د رنځیدلو او ځوریدلو  هیوادوالو  فریاد، اوښکې، ویرونه،  سلګې او زګیروي ، اتلولي او میړانه  او همداسې  د افغانانو په منځ کې د یو شمیر نورو  زړه  بوږنوونکو پیښو تصویرونه  چې د بشریت  په  تاریخ کې ساری  نه  لري  په  ډیرو ښکلو فکرونو، خیالونو، تصویرونو او سیمبولونو کې  داسې انځور کړي دي ، چې په لوستلو یې د هر لوستونکي  په  زړه، ذهني او رواني حالاتو کې جذبې،  ولولې، انساني، اخلاقي عواطف  او احساسات  راپاروي .

 د ادب  قدرمنو او درنو  مینه والو !

دا داستاني ټولګه   زموږ د هیواد په سیاسي، ټولنیز اوفرهنګي ډګر کې لکه  د نورو لیکوالو اثارو په  څیر،  هغه  اغیزمن  او ارزښتمن  اثر دی، چې په څو واره  لوستلو ارزي .

زه ښاغلي  مفتاح الدین ساپي  ته  د دې  ګټور  اثر  د چاپولو له  کبله مبارکي  وړاندې کوم اود ده  دلا نورو  بریوو او هستونو په هیله یم .

په  ډیره مینه او مننه : انجنیرعبدالقادرمسعود

 

 

 

 

 

نور ښکاره کړئ

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Back to top button