Home سياسي او ټولنيزې ليکني د ګډ حکومت بل تاریخي شرم

د ګډ حکومت بل تاریخي شرم

د ګډ حکومت له جوړیدو راهیسې د حکومت د شریکانو کارنامې اوریدل کیږي او لیدل کیږي په ځانګړي ډول د ګډ حکومت د مشر د نړۍ د دویم متفکر غني او د ګډ حکومت کشر عبدالله کارنامې. تیره ورځ یې بیا هم یوه داسې کارنامه وکړه چې په تیرو هغو یې ولس شکر اوباسي. د غني په لارښوونه تیره ورځ د کابل بانک لوی لوټمار او پخواني شریک خلیل الله فیروزي د ښار جوړونې له وزارت سره د سمارټ سیټي په نوم د خصوصي ښارګوټي د جوړولو تړون لاسلیک کړ. د ولسمشر حقوقي سلاکار عبدالعلي محمدي د تړون د لاسیکولو پر مهال وویل، ولسمشر غني داسې حکم صادر کړی، چې د کابل بانک د فساد د قضيي ښکیل او زنداني شریکان خوشې شي، ترڅو پانګونې وکړي او له خپلو پانګونو نه د بانک پورونه ادا کړي.

ﭘﻪ پښتو کې ﻣﺘﻞ ﺩﯼ چې ﺣﮑﻮﻣﺖ ﺩ ﻣﺎﻝ ﺧﻮﺭﺍﮎ ﺩﺭﺩ ﻟﺮي ﻣﺮګ ﻧﻪ ﻟﺮي ﺧﻮ دلته په افغانستان کې ﺧﺒﺮﻩ ﺑﻞ ډول ده. دلته د حکومت مال او د ملت مال خوړل ویاړ دی. دلته د ملت مال خوړل سرلوړي ده، په دې هیواد کې هر غل، وحشي، قاتل او اختطافچي ازاد ګرځي، دلته چې څومره دا ولسونه لوټې، څومره دا ولس وژنې او څومره چې دا ولس بي عزته کوې هغومره به لوی شخص یي او هغومره به دی خلک احترام کوي. دلته د ولس مال خوړل سیاست دی او دلته د خلکو په مال خیټه اچول د چارواکو او زورواکو اصول دي. همدا خلیل الله فیروزي چې د هیواد استیناف محکمې په پنځلس کلن بند او د ټولو غلا شویو پېسو او هغو د ګټې په بېرته ورکړه محکوم کړی و؛ نن څنګه او د کوم عذر له مخې؛ نه یوازې دا چې له زندانه خوشې کیږي بلکه ورسره د هیواد یوې مهمې پروژې قرارداد هم لاسلیک کیږي؟

خلیل الله فیروزي محکمې په پنځلس کاله بند او ۵۰۰ میلون ډالره جریمې محکوم کړی خو تیره ورځ فیروزي پخپله د مطبوعاتو مخې ته راڅرګند شو او د Kabul Smart Cit  ښارګوټي قرارداد یې د ښار جوړونې وزارت سره لاسلیک کړ، په داسې حال کې چې نوموړی د محکمې د حکم له مخې لا هم بندی دی او باید پنځلس کاله بند تیر کړي.

د زنداني یو تعریف دا دی چې هیڅ زنداني د بند په موده کې د هیڅ راز پانګونې او تجارت صلاحیت نه لري. اصلاً زندان ته د یو زنداني د ورتګ معنا داسې ده چې زنداني د یو شمیر هغو حقوقو څخه چې یو آزاد شخص یې لري؛ محرومیږي. ګډ حکومت وایې چې فیروزي خلاص شوی نه دی بلکه اجازه ورته ورکړل شوې چې د کابل سمارټ سیټي په ښارګوټي کې د قراردادي په حیث برخه ولري، د ارګ دغه خبره هم له شرمه ډکه مسخره ده، که د دوي په باور یو زنداني د پانګونې او تجارت حق ولري نو بیا خو ورته زنداني نه ویل کیږي بلکه آزاد شخص دی، داسې ویل کیږي چې فیروزي شپیته جریبه ځمکه هم لري نو پوښتنه دا پیدا کیږي چې که نوموړی په ۵۰۰ میلون ډالرو جریمه محکوم دی نو ولې یې دا جریمه نه ده ادا کړې؛ په داسې حال کې چې شپیته جریبه ځمکه ملکیت هم لري؟
ولې یې دا ملکیت نه دی ضبط شوی؟
ولس پوښتنه کوي چې داسې کوم مرجع شتون لري چې د فیروزي اړوند د محکمې حکم یې لغوه کړی دی؟
کله چې محکمې نوموړی په بند محکوم کړ نو بل داسې څوک شته چې د فیروزي له زندانه د خوشي کولو حق ولري؟ 
ګډ حکومت چې د کابلبانک لوي لوټمار په خوشي کولو او له دې سره د اساسي قانون او نورو قوانینو خلاف لوی مجرم ته برأت ورکړ؛ آیا د ګډ حکومت دغه کار به په هیواد او ولس کې له قانونه د تيښتې او له سزا څخه د معافیت روحیه پیاوړې نه کړي؟
او د ګډ حکومت دغه کار به له اداري فساد سره د مبارزې په برخه کې څومره بهرنۍ ادارې په ځان بې باوره کړي؟

د ګډ حکومت له لوري د کابل بانک د دیوالي کیدو لوی لامل او لوټمار خلیل الله فیروزي له زندانه خوشي کول هیڅ قانوني او حقوقي توجیه نه لري، او باید ولسمشر، اجرایه مشر، په ښې حکومتولۍ کې د ولسمشر ځانګړی استازی ضیا مسعود، د ولسمشر حقوقي سلاکار عبدالعلي محمدي، د ښارجوړونې وزیر او په ټوله کې ګډ حکومت باید ولس ته وضاحت ورکړي. که داسې نه وي نو اوس دې د ملي وحدت حکومت تر نامه لاندې ګډ حکومت یو بل کار هم وکړي؛  ټول غله، جنایتکاران، قاتلین، جنګسالاران، تروریستان او اختطافچیان دې ازاد کړي او دا باقي ملت دې په زندانونو کې واچوي ترڅو د شره خلاص شي.

لیکنه : خوشحال آصفی

 

- Advertisement -

LEAVE A REPLY

Please enter your comment!
Please enter your name here

- Advertisment -

ډېر لوستل شوي

آیا تاسو وخت مدیریت کوﺉ که وخت تاسو؟

آیا تاسو وخت مدیریت کوﺉ که وخت تاسو؟ ژباړن: انبیا ژمن تاسو باید له ځان څخه څلور ساده پوښتنې وکړﺉ. 1. تاسو له هغوکارونو سره که...

د وخت مدیریت

د وخت مدیریت ژباړن: انبیا ژمن غورچاڼ: د وخت د مدیریت له مهمو بنسټونو څخه یو د ۸۰-۲۰ اصل دی، یعنې له ۲۰ سلنې وخت...

د قرآنکريم په اړه هېښنده رښتياتوبونه

د قرآنکريم په اړه هېښنده رښتياتوبونه (واقعيتونه): ډاکټر طريق السوادان په قرآنکريم کې داسې آيتونه موندلي چې ښيي يوه موضوع له بلې سره برابره ده،...

د کُمینتِرن رامنځته کیدل، فعالیت او انحلال

لومړۍ برخه د کمینټرن د بنسټ ایښودلو لومړۍ نړیواله کنګره نور محمد غفوري ما مخکې په یوه لیکنه کې چې (د کارګري انټرناسیونالیسم پیدايښت او وده)...

Recent Comments