غواړم چې په لاندې ټکو کې هغه انسانانو ته یو څه لنډ معلومات ورکړم چی اوس له خپل دین یعنی اسلام څخه خپلې پښې سپکوی ، . زه غواړم چې دغه معلومات په لاندې توګه د اسلام په پنځو بناوو (۵) کې د اسلام ګټې په دنیوی ژوند کې په پرتلیزه توګه روښانه کړم،چې د اسلام دین نه یواځې چی زموږ د اخروی ژوند د بریالیتوب زیرې راکوی بلکې په ننی ژوند کې یی هم انسانانو او موجوداتو ته له حد او برید نه زیا تې ګټې شته دي یو څوک چې یو تعمیر جوړوي بیا هغه ته یو ځانته مدیریت جوړوي چې هغه ته په دری او عربی ژبه کی حفظ او مراقبت وایي د هغه دنده دا وي چی د دغه ودانۍ هر ډول خرابۍ ته متوجې وي او پخپل وخت سره د هغې د خرابۍ له ژرغورلو هڅه کوي الله تعالی چی انسان جوړ کړلو او دې دنیا ته یې را ولیږلو د هغه د حفظ او مراقبت لپاره الله تعالی انبیاء، کتابونه او داسې څه را ولیږل چی واقعا د انسان د ژوند په هر اړخ کې هغه پوره د انسان دژوند د ساتنې وعده ورکوي .
1) اوله کلمه طیبه ده دغه هغه عقد او قرار داد دی چی د انسان او دهغه د معبود تر منځ تړل کیږي چی په هغه کې د اسلام د دین ټولو احکامو ته پوره غاړه ایښودل کیږی او بیا دغه ډول انسان ته پوره سکون ور په برخه کیږي او هغه ته له دغه ژوند وروسته هم د ښه امید زیری ورکوي چی هغه د اخروی ژوند د جنت امیتاز دی . هرڅو ک چی دغه ډول قرار داد یې نه وي لاسلیک کړی هغه په ډول ډول رواني او عصبي ناروغیو اخته وي هغه د ژوند منظمه تګلاره نه لري او کله په یو او کله په بل باور کوي کله یې خپل دین ورته باطل ښکاري خو د اسلام دین چی ۱۴۰۰ کاله مخکې را نازل شوی دی بیا ترننه هیچا هم په دغه دین کې یوه وړوکې خالیګا او منفی اړخ ندی موندلی، او که لږ غوندې تېروتنه يې هم پکې موندلی وای یا ومومی نو بیا د نن ورځې د ابوجهل زامنو او فرعونیانو به له هغه نه لویه ګنګوسه جوړه کړی وای . خو داسی دینونه هم شته چی هغه خپل دین ته په تشویش کې دي د هغو خدای کله یو حیوان وي یا جامدڅیز وی (بت)، هندوان چی ددوی په اصطلاح غواګانی یا بوتان د دوی خدایان دي او یا هم عیسویت د دین پلویان چی کله له خپل پیغمر نه د خدای زوی جوړي او کله یی د خدایی مرتبی ته خیژوی دوی د همدغې بې نظمۍ له امله د زړه سکون نه لري او نه د خپل دین په وړاندی تراوسه له خپل ځان نه تیر شویدی یعنی دا معنی چی د هغوی دین د دوی په وړاندی بی معنی څیز دی .
2) د اسلام له بناوو څخه دویمه بناء لمونځ دی چې الله تعالی په ټولو مسلمانانو باندې په ورځ کې پنځه وخته فرض کړیدی، د لمانځه طبی ګټې: د روغتیا له پلوه اودس کول د لمانځه شرط دی چی پنځه وخته انسان د هر ډول چټلۍ او میکروبو څخه ساتي انسان ته په ژوند کې مهال ویش ورته ښیی د روغتیا له پلوه انسان د ښه بدنې روزني پر مخ بیایی او په لمانځه کې هغه حرکات لکه سجده چی د انسان د سر ټول هغه مثبت چارجونه د مځکی له منفی چارج سره خنثی او د انسان لپاره د راحت سبب ګرځي او په هغه وخت کی د دماغ نسج د وینی په جریان ښه خړوبه کیږی، چی دا هم د طب له نظره د انسان لپاره پوره آرامي وربښي او د رکوع حرکات د ملا د مهرو ښه پاملرنه کوي لنډه داچی که ښه ترسره شي له حد او بريد نه زیاتې ګټې لری چی اوس هغه خلک چی اسلام نه مني خو دغه لمونځ یی د خپل بدن د ښې روزنې په موخه ترسره کوي .
3) دریمه بناء روژه ده : روژه الله تعالی په ټولو عاقلو بالغو مسلمانانو باندې په یو کال کې پوره یوه میاشت فرض ګرځولې ده ددې ګټې زیاتې دی خو زه به یې د یو څو یادونه وکړم ، د معدې دندې ته پوره توجه او پاملرنه د معدې لپاره د استراحت یوه کلنۍ دوره ده چی په دغه دوره کې د معدې ټپونه ښه رغیږی او د بدن هغه اضافی شحم چی په رګونو او د بدن په نورو برخو کې اضافه بار زخیره شوی دي له منځه ځی چی د وینی فشار او د شکرې ناروغی په وقایه او درملنه دواړو کې ډېر رول لري په حدیث شریف کې راځی رسول الله فرمایی (قال رسول الله (ص) نحن قوم لا ناکل حتی نجوع و اذا اکلنا لانشبع الحدیث) یعنی رسول الله ص فرمایی: چې موږ یو قوم یو ترهغه پورې نه خورو تر څو وږی نشو او چی کله طعام غذا خورو نو بیا ځان نه مړوو ) انسان ته د لوږې ،تندې او استقامت درس ورکوي او د وږيو انسانانو د ژوند له حاله یی خبروي. د شپی تهجد یی د زړه د نارغیو مخنیوی کوي لکه چی اوسنی ساینس ثابته کړی ده چی اکثرا د زړه حملې د شپې له څلورو بجو تر سهاره ۱۰ بجو پورې راځي(۱ماخذ) او دلیل يې دا ښودلی چی څومره انسان په دغه وخت کې د استراحت په حالت کې وي نو د انسان په بدن کې د الدسترون په نامه هورمون افرازیږی چی هغه د رګونو په کولسترولو باندې تاثیر کوي او د کولسترول ټوټې بی ځایه کوي اوهغه بیا د رګونو د بندښت سبب ګرځي نو الله تعالی ټولو انسانانوته نه یواځې، چې د اخرت اجر او بدلی وعده ورکوي له دغه ډول استراحت مخه هم نیسی چې د بدن د ځنډنی استراحت سبب ګرځي او په هغه معین وخت، چې د سهار وختی وخت دی یا دریمه برخه د شپې هغه یی د بدن په خوځښت د عبادت په ترسرکولو زیات کړیدی تر څو د الدسترون د بی نظمه افراز مخه ونیسی .او دغه حالت ما خپله تجربه کړی دی د کابل ابن سینا په روغتون کی می درې کاله د تخصص دوره وه کله به چی نوکری وم نو اکثرا د زړه د ناروغی ناروغان به د سهارله لمانځه نه بیا تر اتو بجو پورې روغتون ته راتلل او ویل به یی چی دومره شدید درد را ته پیدا شوبیا می ژامې او لاس ته سرایت وکړ چی له خوبه یی پاڅولوم او خولې می ورسره وکړلې او نفس می ورسره قید شو .. موږ په طبی اصطلاح ورتهChest Pain وایو چی بیا IHD ( ischemic heart disease ). تر اخره تاریخچه .
4) څلورمه بناء د اسلام زکات دی الله تعالی زکات ورکول په مسلمانانو چې د زکات نصاب ولري فرض کړی دی لکه لمونځ کول حضرت ابوبکر صدیق رض به ویل چی که څوک د لمانځه او زکات ترمنځ په امر کی لږ هم شک وکړي نو زه به ترینه سر پریکړم د نن ورځی که هر ډول د بیمیی پروګرامونه دی هغه ټول له همدغه زکاته کاپی شوی دی خو اصل یی له موږ سره په اسلام کې دی متاء سفانه چی موږ یې په کاپی پسی روان یو که دغه حکم په ښه توګه مسلمانان په ځان تطیبق کړی یو مسکین او غریب به هم په ټولنه کي پیدا نکړی او دغه زکات انسان ته د ورکړی او د خپل مال د ګټې تاوان او د هغه د بیلانس او معلومولو ښه درس ورکوی .
5) پنځمه بنا ء حج ده الله تعالی حج په ټولو مسلمانانو فرض کړی دی حج مسلمانانو ته د اجتماعی ژوند درس ورکوی د یو اوبل له حاله یی خبروی د نړی ټول وګړی یومکان ته را غونډوی چی په کال کی هر مسلمان وکولای شی د دغې فریضې د کولو پر مهال خبر کړي او د ښه سفر او مقاومت زغم صبر او نورو ملګرو سره د وخت تیرولو ښه درس ورکوي په نړی کې یو دین هم داسې لوی سمینار نلري چی ټول ادیان یې په یو ټاکلی وخت کې راغونډ شي او یو له بل سره اشناء شي . یعنی د اسلام دین تر بل هر دین د نظم او انسجام ښه دین دی . او له حج نه وروسته انسان ته یو خاص سکون پید اکیږي چی د هر ډول روانی ناروغیو په وړاند ي ډیر لوی مقاومت ښیی .
هیله ده چی زما د دغو کمو معلوماتو په سبب تاسې دې اړشی چې د الله تعالی په اوامرو کی د الله تعالی د هغه حکمتونو پلټنه وکړئ چی موږ یې هیڅ کله هم شکرنه دی اداء کړی .
له بده مرغه چې د نن عصر او زمان اهل د دغه ستر الهي دين پر ضد لويي هڅې رواني دي تر څو خلک د برحق الهي دين څخه د خپلو شومو اهدافو په خاطر شيطاني باطلو اديان ته دعوت کړي او خصوصا د عیسویت دین چی په افغانستان کی د انټرنټ په مټ ، د خلکو سره په مالي مرستو او د خارج په سفرونو او نورو هر ډول تبلیغاتو بازار ګرم کړی دی او زموږ د هيواد ځنې بزدله هیوادوال د هغوی دین ته ورځی او د اسلام سپڅیلی دین په پټه توګه پریږدي او له شرمه بیا اقرار هم نه کوي چی زه اوس عیسوی یم خو د خپل دنیوي کموګټو په مقابل کې د اخرت هغه لوی جهنم ځآنته په لوی قیمت اخلی نن ورځ جنت په کم لګښت اخیستل کیږی خو دوزخ او جهنم په لوړ قیمت ، هغه دا چې عبادت ارزانه کار دی خو هغه څوک نه کوي او ګناوې چی د ډېرو پیسو لګولو ته پکې اړتیاشته ده هغه بیا زیات کسان ترسره کوي .
په درنښت
ډاکټر عبد الرحمن رحیمی
پدې اړه بحث post